2-anyos pisak sa truck

Kalunus-lunos ang sinapit ng isang 2-anyos na paslit makaraang mapisak ang katawan nito nang maipit sa pagitan ng dalawang sasakyan at pagulungan pa, kamakalawa ng hapon sa Caloocan City.

Namatay noon din ang biktimang si Lovely Jane Tabaquero, residente ng #85 Alaska Alley, Malolos Ave., Bagong Barrio, nabanggit na lungsod.

Boluntaryo namang sumuko sa pulisya at nahaharap sa kaukulang kaso ang suspect na si Romulo Menero, 56, driver at residente ng #178 Pitsayan St., Camarin, Caloocan City.

Batay sa ulat ng pulisya, dakong alas-3:45 ng hapon nang mangyari ang insidente sa kahabaan ng Malolos Ave., Bagong Barrio, nabanggit na lungsod.

Nabatid na kasalukuyang naglalakad sa bangketa ang biktima kasama ang kanyang tiyahin nang biglang makahulagpos ang una sa pagkakahawak ng huli at napasandal ito sa isang nakaparadang sasakyan.

Sa puntong ito ay biglang dumaan ang isang Isuzu Elf truck na may plakang TLU-860 na minamaneho ni Menero at tuluy-tuloy na nasagi ang paslit kung saan naipit sa pagitan ng sasakyang kanyang sinandalan at ng truck.

Sa kabila ng paghuhumiyaw ng mga nakasaksi ay hindi ito narinig ni Menero hanggang sa magulungan pa ng hulihang gulong ng kanyang truck ang biktima sanhi upang tuluyang masawi ang bata. (Rose Tamayo)