2 Station commander sibak sa jueteng

Sinibak ni National Capital Region Police Office (NCRPO) director Vidal Querol ang dalawang station commander sa Quezon City Police District (QCPD) bunga na rin ng ipinatutupad na one-strike policy sa jueteng.

Ang mga sinibak sa puwesto ay nakilalang sina Supt. Franklin Mabanag ng Novaliches Station 4 at Supt. Felicidad Gido, ng Fairview Police Station 6.

Ang pagsibak sa dalawa ay bunsod na rin ng isinagawang pagsalakay ng mga tauhan ng NCRPO- Regional Intelligence Special Operation Office (RISOO) sa bolahan ng jueteng sa kanilang mga nasasakupan.

Sa isinagawang pagsalakay, naaresto ang walong katao na ilan dito ay nakilalang sina Jomar Naz, Alberto Nacional, Maximo Oliveros, Winifredo Oreta.

Sinabi ni Querol na ang pagkakadakip sa walo ay pagpapatunay lamang na talamak pa rin ang sugal na jueteng sa kanilang nasasakupan.

Binanggit pa ni Querol na dapat na maging babala ito sa iba pang station commander na ang jueteng ay dapat na walisin sa kanilang nasasakupan dahil hindi umano siya magdadalawang-isip na alisin sa puwesto ang mga hindi sumusunod sa ipinatutupad na ‘one-strike policy’. (Doris Franche at Edwin Balasa)