Inireklamo ng biktima na itinago sa pangalang Boy, 17, mangangalaykay ng basura ang suspect na si PO1 Ronaldo Hipolito, nakatalaga sa Manila Police District- HQ Support Unit.
Napilitang dumulog ang biktima sa NBI Special Task Force ni Atty. Reynaldo Esmeralda matapos na hindi umano siya pansinin ng mga kagawad ng MPD-General Assignment Section nang ireklamo ang ginawang pang-aabuso sa kanya ng pulis.
Sa salaysay ng biktima, naghahalungkat umano siya ng basura sa may Happy Land, Tondo nitong Sabado ng gabi nang damputin ng suspect. Dinala umano siya sa may Sarmiento St. malapit sa MPD-Station 2 at pinaaamin sa pagnanakaw ng isang pedicab at washing machine.
Itinanggi naman ng biktima ang bintang at sa kabila ng kanyang pagmamakaawa sinabi nito na pinalo siya ng dos-por-dos sa katawan. Pinaso pa umano siya ng sigarilyo sa mukha at likod at hindi pa nakuntento ay pinaghihiwa pa ng suspect ang kanyang katawan gamit ang ilang bubog.
Nagawa namang makatakas ng biktima at nakahingi ng tulong sa mga kaanak. Nilapatan naman ito ng lunas sa Gat. Andres Bonifacio Hospital kung saan nagtamo ito ng 30 tahi sa mga sugat sa katawan. (Danilo Garcia)