Drug test, alisin – FEJODAP

Ipinatatanggal ng transport group sa pangunguna ng Federation of Jeepney Operators and Drivers Association of the Philippines (FEJODAP) ang pagsasagawa ng drug test sa mga kukuha ng non-professional at professional driver’s license sa Land Transportation Office (LTO).

Ayon kay Zeny Maranan, national president ng FEJODAP, dapat na alisin ang requirement na drug test sa pagkuha ng drivers license dahil hindi naman ito umano nakakatulong para mabawasan ang mga addict na driver sa bansa.

Aniya, dagdag na gastos lamang ito sa mga nais na kumuha ng lisensiya at hindi naman namo-monitor ng mabuti ng Department of Health (DOH).

Iminungkahi din ni Maranan na kung hindi maaalis ang drug test bilang requirement, mas makabubuti na gawing taunan ang renewal ng drivers license. (Angie dela Cruz)