Dead-on-arrival sa United Doctors Medical Center ang biktimang si Edgar Diego, 61, ng Village East Subdivision, Cainta, Rizal habang nakakulong naman ang suspect na si Gaudencio Lorilla, 60, ng 51-C E. Rodriguez Blvd., Doña Josefa, Quezon City.
Batay sa imbestigasyon ng Quezon City Police District-Criminal Investigation Division (QCPD-CID), naganap ang insidente dakong alas-2 ng madaling-araw sa Kambingan Videoke Bar sa 51-A E. Rodriguez Ave., Quezon City.
Nabatid na lumayas ang katulong ng suspect noong Huwebes ng gabi at inakala nito na nagpunta naman sa bahay ng biktima. Minabuti ng suspect na puntahan sa nasabing videoke bar ang biktima kung saan agad itong kinompronta ng una na humantong sa mainitang pagtatalo.
Naging matigas naman ang biktima sa pagtanggi na hindi niya alam kung nasaan ang katulong ng suspect. Dahil dito, agad namang bumunot ng patalim ang suspect at walang sabi-sabing sinaksak ang biktima nang paulit-ulit.
Inihahanda naman ang kasong murder laban sa suspect habang nakakulong sa QCPD-CID. (Doris Franche)