Ang biktima na patay na nang matagpuan ng mga kaanak, habang halos namamaga na ang tiyan sanhi ng maruming tubig na nainom ay nakilalang si Baby Garcia, 1-taong gulang, ng North Bay Blvd. South ng nasabing bayan.
Ayon sa ulat ng pulisya, dakong alas-6 ng umaga nang maiwan ang biktima habang natutulog sa duyan nito ngunit pagbalik ng ina nito ay wala na ang sanggol sa pinag-iwanang duyan. Agad itong nanghingi ng tulong sa mga barangay tanod hanggang sa may makapagsabing baka nahulog sa ilog ang sanggol base na rin sa salaysay ng ina nito na nakataob ang pinag-iwanang duyan sa biktima.
Nagkani-kanyang hanap ang mga tanod sa ilalim ng bahay ng pamilya Garcia ngunit hindi rin ito natagpuan hanggang sa may makapagsabing baka tinangay ito dahil na rin sa malakas na alon.
Makalipas ang ilang minuto, isang tanod ang nakapagsabi sa ina ng biktima na natagpuan na ang sanggol sa Malabon-Navotas river na lumulutang kasama ng mga basura at wala nang buhay. (Ulat ni Rose Tamayo)