Namatay habang ginagamot sa Makati Medical Center ang biktimang si SPO1 Larry Bernal, nakatalaga sa Mobile Patrol Unit ng Pasay City Police sanhi ng tinamo nitong dalawang tama sa dibdib buhat sa kalibre .38 baril.
Samantala, ginagamot din sa nabanggit na ospital ang isa sa dalawang suspect na nakilalang si Celito Homecillo, 38, ng Brgy. Rizal, Makati City sanhi ng tinamo ring tama sa katawan makaraang gumanti ng putok ang mga awtoridad.
Base sa ulat, naganap ang insidente dakong ala-1:15 ng madaling-araw sa panulukan ng EDSA at Rodriguez St., sa Pasay City habang nagpapatrulya ang biktimang si SPO1 Bernal kasama si SPO1 Nestor Lasala.
Namataan ng mga pulis si Homecillo kasama ang isa pang lalaki na may kahina-hinalang kilos.
Sinita ng mga pulis ang dalawang suspect na kaagad na nagbunot ng baril at pinaputukan ang mga awtoridad. Tinamaan dito si SPO1 Bernal.
Sa kabila na sugatan ay nakipagpalitan pa rin ng putok si Bernal at Lasala kung saan tinamaan si Homecillo, samantalang mabilis na nakatakas ang kasama nito.
Naniniwala ang pulisya na maaaring magsasagawa nang panghoholdap ang dalawang suspect ng matiyempuhan ng mga awtoridad kaya napilitan na lamang ang mga ito na manlaban. (Ulat ni Lordeth Bonilla)