Nasawi matapos na mabasag ang bungo ng biktimang si Ronald Santos, binata, walang hanapbuhay, at residente ng #2218 Ugbo St., Vitas, Tondo, Manila.
Sa ulat ng WPD-Homicide Section, dakong alas-12:20 kamakalawa ng hapon nang maganap ang nasabing insidente sa 2nd floor ng gusali sa Clinical Division ng ospital.
Ayon sa mga saksi, hindi nila namalayan na bumangon sa kanyang higaan ang biktima at narinig na lamang ng ilan ang malakas na kalabog sa semento nang tumalon ito.
Agad na dinala ng mga doktor sa operating room ang biktima upang sagipin ang buhay subalit namatay din ito ng bandang alas-8:50 ng gabi.
Sa pagsisiyasat ng pulisya, nabatid na naratay ang biktima sa sakit na Cushing Syndrome nitong June 3.
Bukod sa pagpapakamatay, posible umano na nagtangka lamang tumakas sa pagamutan ang biktima ngunit nauna ang ulo nito sa pagtalon kaya kamatayan ang sinapit.
Malaki ang hinala na hindi matiis ang sakit na nararamdaman ng biktima kaya nagpasya itong kitlin ang buhay.
Bago ang pagpapatiwakal, pumasok ang biktima sa comfort room at pinalabas lamang ito ng tiyahing si Elvira.
Ilang saglit pa lamang ang nakakaraan nang dumaan ito sa bintana saka tumuntong sa andamyo nito, pumikit at tumalon na una ang ulo.
Sa pag-iimbestiga ng pulisya, napansin sa katawan nito ang pulang mga pantal na pinaniniwalaang dahilan ng kanyang karamdaman. (Ulat ni Danilo Garcia)