"Ginagantihan lang nila, kaya nila ako kinasuhan ng attempted robbery extortion sa tanggapan ng Ombudsman dahil sa hindi nila ako nakayang suhulan at hindi namin inurong ang demandang rape laban kay Rodolfo dela Cruz".
Ito ang pahayag kahapon ni Nena Balbas, na nakatalaga sa DSWD sa Makati City.
Bukod dito, sinabi pa ni Balbas na mula nang hindi niya iurong ang paghaharap ng kasong rape laban kay dela Cruz ay nakatanggap na siya ng pagbabanta sa kanyang buhay.
Ipinaliwanag pa nito na noong Abril 6, 2005, tatlong beses siyang tinawagan ng anak ni dela Cruz, na si Mary Macapagal.
Pinagbantaan umano siya nito na iurong ang kaso laban sa kanyang ama at inalok pa siya ng halagang P250,000 kapalit ng hindi niya pagsuporta sa kaso.
Gayunman, itinuloy pa rin nila ang kaso laban kay dela Cruz na maaaring siyang ikinagalit ng pamilya nito at ginawan naman siya ng kaso sa Ombudsman.
Mariin nitong pinabulaanan na nanghihingi siya ng P1 milyon sa rape suspect na si dela Cruz para maiurong ang demanda.
Si dela Cruz ay ipinagharap nila ng kasong rape makaraang ilang ulit nitong gahasain ang 14-anyos na dalagita na kanilang katulong. (Ulat ni Lordeth Bonilla)