Batay sa dalawang pahinang complaint affidavit ng rape-accused na si Rodolfo dela Cruz at anak nitong si Mary Ann Macapagal, sinampahan nila ng kasong attempted robbery extortion at grave threats ang social worker na si Nena Balbas sa Office of the Ombudsman.
Batay sa rekord, noong Marso 21, 2005, habang isinasailalim si dela Cruz sa preliminary investigation sa kaso nitong rape sa tanggapan ni Makati City Prosecutor Marilyn Agama ay inalok ni Balbas si Macapagal na makipag-usap ito sa kanya.
Mula sa nasabing tanggapan ay sumakay umano sa taxi sina Macapagal at Balbas upang sa ibang lugar mag-uusap kung saan tinakot umano ni Balbas si Macapagal na malaki ang posibilidad na mahahatulan ng kamatayan ang ama nito dahil wala umanong magagawa ang abogado nito sa kanyang kaso hanggang sa alukin na ni Balbas si Macapagal na magbigay na lamang sa kanya ng P1 milyon upang bayaran na lamang ang biktima ni dela Cruz kung saan ito umano ang maitutulong niya sa akusado.
Binalaan pa umano ni Balbas si Macapagal na huwag sabihin sa iba ang kanilang napagkasunduan at bunga nito ay sinampahan ng nabanggit na mga kaso ni dela Cruz si Balbas dahil wala naman umano siyang kasalanan sa kasong rape na isinampa sa kanya. (Grace dela Cruz)