Si ex-Councilor Manolo Zamora, pamangkin ni Cong. Ronny Zamora at asawa naman ni incumbent Councilor Frannie Zamora ay sumugod sa session hall kasama ang limang armadong bodyguard na nakasuot lang ng short at t-shirt upang komprontahin si Konsehal Clemente Bargas dahil sa umano’y pag-ipit nito sa pinapipirmahang ‘barangay administrative case’.
Maging ang bise-alkalde ng bayan na si Boy Celles ay hindi rin nakaligtas sa galit ng dating konsehal at kung anu-ano ang pinagsasabi laban dito.
Nabatid na dakong alas-12 ng tanghali ng bulabugin ni Zamora ang kainitan ng sesyon at pagmumurahin ang mga konsehal sa pag-aakalang pinagkakaisahan ng mga ito ang kanyang asawa.
Matapos ito ay galit ding sumugod sa tanggapan ni San Juan Mayor Joseph Victor Ejercito ang nasabing dating konsehal kasama ang dalawang armadong bodyguard subalit imbes na kampihan siya ng alkalde ay pinagsabihan pa siya nito dahil sa kanyang inasal.
Sa kasalukuyan ay pinag-aaralan pa ng iba pang konsehal kung anong kaso ang puwede nilang isampa kay Zamora. (Ulat ni Edwin Balasa)