Bentot Jr. huling nagsa-shoplift

Kinasuhan ng Central Police District-Baler Police Station sa Quezon City Prosecutor’s Office ang komedyanteng si Bentot Jr. matapos na mahuli sa aktong nang-uumit ng ilang grocery item sa loob ng isang supermarket, kamakalawa sa nabanggit na lungsod.

Kasong theft ang isinampa ng SM Supermarket laban kay Bentot Jr., 34, Luisito Medina sa tunay na buhay at naninirahan sa Emerald St. Greenheights, Brgy. Bartolome ng nabanggit na lungsod.

Batay sa rekord, nahuli ni Comelia Rollo ng SM Supermarket sa North EDSA si Bentot na nagsisilid sa kanyang bag ng mga grocery item dakong alas-2:30 ng hapon sa loob mismo ng nasabing establisimento.

Ilan sa mga inumit nito ay isang Maxwell coffee na nagkakahalaga ng P473.75; isang Lander lotion, P87.75; isang Johnson Baby wash na nagkakahalaga ng P141.50.

Inirekomenda naman ng piskalya ang piyansang P10,000 para sa pansamantalang kalayaan nito. (Ulat ni Doris Franche)