Retiradong pulis sinalvage

Isang retiradong pulis ang pinaniniwalaang biktima ng salvage makaraang matagpuan ang bangkay nito na nakahandusay sa kanal at may tatlong tama ng bala ng baril sa ulo, kahapon ng umaga sa Marikina City.

Nakilala ang pinaslang na biktima na si SPO4 Nehemias Dela Cruz, 56, retiradong pulis na dating nakatalaga sa Central Police District at residente ng Lot 26 Libra St., Pangarap Village, Caloocan City.

Base sa ulat dakong alas-6:50 ng umaga ng matagpuan sa isang kanal sa kahabaan ng C.M. Recto Extension sa Brgy. Parang, Marikina ang labi ng biktima. Tinatayang may apat na oras nang patay ang biktima makaraang ito ay matagpuan.

Hindi rin ginalaw ng mga suspect ang P20,000 cash sa bulsa ng biktima maging ang ilang mamahaling gamit at alahas nito.

Malaki ang paniwala ng pulisya na itinapon lang sa naturang lugar ang biktima dahil sa walang bahid ng dugo sa paligid na napagtagpuan dito.

Isang malawakang imbestigasyon ang isinasagawa ng mga awtoridad para alamin kung sino ang sangkot sa pagpaslang dito at kung ano ang motibo sa isinagawang pagpatay sa biktima. (Ulat ni Edwin Balasa)