Anak ng pulis pinatay habang umaawat sa away

Namatay ang isang binata na anak ng pulis ng Central Police District matapos na umawat lamang sa away ng kanyang mga barkada kahapon ng madaling araw sa Quezon City.

Dead on the spot ang biktima na si Primitivo Monzalve, Jr, 20, anak ni SPO1 Primitivo Monzalve, Sr. nakatalaga sa CPD-Station 6 at naninirahan sa 19 Constitutional Road, Batasan Hills, ng nabanggit na lungsod.

Mabilis namang tumakas ang itinuturong suspect na nakilala lamang sa pangalang Victor matapos ang krimen.

Batay sa imbestigasyon ni SPO1 Rodrigo Barrameda ng CPD-CIU, naganap ang insidente dakong alas 12:20 ng madaling araw sa Katarungan St. Batasan Hills.

Lumilitaw sa imbestigasyon na papauwi na ang biktima nang maabutan nito ang kanyang mga barkada na nag-aaway.

Matapos na maawat ng biktima ang dalawang barkada, ipinasya na nitong samahan pag-uwi ang suspect.

Habang naglalakad, pinayuhan ng biktima ang suspect na kalimutan na ang nangyari dahil sila ay magkakabarkada.

Subalit bigla na lamang sinaksak ng suspect ang biktima at mabilis na tumakas. (Ulat ni Doris Franche)