Buntis pumalag sa rape sinaksak, kritikal

Pinagsasaksak ang isang 30-anyos na limang buwang buntis na ginang ng isang 19-anyos na estudyante na kanyang kapitbahay matapos pumalag ang una sa tangkang panggagahasa ng huli, kamakalawa ng gabi sa Taguig.

Nasa kritikal na kondisyon at nilalapatan ng lunas sa Rizal Medical Center ang biktimang si Mayda Maliwat ng Block 125 Sitio Imelda, Purok 6 ng Brgy. Upper Bicutan ng bayang ito sanhi ng ilang saksak na tinamo sa ibat-ibang bahagi ng katawan.

Mabilis namang tumakas ang suspect na si George Honrada, ng nabanggit ding lugar.

Sa inisyal na imbestigasyon ng pulisya, naganap ang insidente dakong alas-11:30 ng gabi sa loob ng bahay ng biktima sa Block 125, Sitio Imelda, Purok 6, Brgy. Upper Bicutan, Taguig.

Nabatid na limang buwang buntis ang ginang at nag-iisa lamang ito sa kanyang bahay ng biglang pasukin ng suspect na armado ng kutsilyo.

Tangkang gagahasain ng suspect ang ginang ngunit pumalag ito.

Nagalit ang suspect sa pagpalag ng biktima hanggang sa nagmakaawa ang ginang at isinuhol pa ang pera at alahas upang huwag lang ituloy ng suspect ang balak.

Gayunman, pinagsasaksak pa rin ng suspect ang biktima hanggang sa tuluyang tumakas.

Patuloy ang isinasagawang imbestigasyon sa kaso at ang pagtugis sa suspect. (Ulat ni Lordeth Bonilla)