Holdaper buking sa selosang lover

Arestado ngayon ang isang holdaper at isa pang kasabwat nito matapos na mabuking dahil sa selosang live-in partner na nakakita ng ID ng empleyada sa isang department store, kamakalawa ng gabi sa Quezon City.

Naghihimas ngayon sa rehas na bakal sa Fairview Police Station ang suspect na si Michael Bulao, 21, ng #60 Sampaguita St., Maligaya Park Subd. Pasong Putik at ang kasama nitong si Shero Analucas, 19, ng nasabi ring lugar.

Bago ang pag-aresto, nabatid na nagselos umano ang ka-live-in ni Bulao na si Esmeralda Tagle nang makita sa pitaka ng lalake ang ID ng biktima ng panghoholdap na si Elizabeth Sarol, 25, Asst. Customer Service sa SM Fairview.

Dahil sa sobrang selos, sinugod ni Tagle si Sarol sa nasabing establisimento sa pag-aakalang kalaguyo ito ng kanyang kinakasama.

Ikinagulat naman ni Sarol ang ginawang pangongompronta sa kanya ni Tagle at nakita hawak pa nito ang kanyang company ID na kasama sa nakulimbat ng mga humoldap sa kanya noong nakaraang Martes ng gabi.

Dahil dito ay agad na nagsuplong sa pulisya si Sarol at agad na nagsagawa ng follow-up operation ang mga operatiba dakong alas-9 ng gabi kamakalawa.

Nadakip sina Bulao at Anlucas subalit nanlaban pa ang una kung saan sinaksak pa nito ang isa sa mga arresting officer na si PO1 Taib Amirul dahilan upang mabaril ang una at tamaan sa katawan.

Nakuha din mula sa mga suspect ang iba pang kagamitan ni Sarol at iba pa nilang nabiktima. (Ulat ni Doris Franche)