2-anyos dedo sa ambulansiya

Patay ang isang 2-anyos na batang babae makaraang masagasaan ng ambulansiya habang papatawid, kamakalawa ng gabi sa Marikina City.

Hindi na umabot pang buhay sa pagamutan ang biktimang si Welgelyn Mursilla, residente ng Jasmin St., San isidro 2 Brgy. Concepcion 1 ng nabanggit lungsod, samantalang agad namang sumuko sa pulisya ang suspect na si Rodolfo Magna, 54, ambulance driver ng Rescue 161 ng Marikina City.

Sa ulat, naganap ang insidente dakong alas-8 ng gabi sa kahabaan ng Sampaguita St., San Isidro Village ng Brgy. Concepcion 1 ng nabanggit na lungsod habang minamaneho ng suspect ng ambulansiyang Toyota Hi-Ace na may plakang SFX-188.

Nabatid na bigla na lang umanong sumulpot ang biktima mula sa madilim na bahagi ng lugar dahilan upang matumbok ito ng ambulansiya.

Mabilis namang isinugod ng suspect ang biktima sa pagamutan subalit hindi na ito umabot pang buhay.

Kasalukuyang nakapiit ang suspect sa Marikina City detention cell habang inihahanda ang kasong reckless imprudence resulting to homicide. (Ulat ni Edwin Balasa)