1 pang ASG leader nasakote sa Makati

Matapos ang ilang taong pagtatago sa batas, nabitag ng mga operatiba ng Anti-Terrorism Task Force (ATTF) ang isang lider ng ASG na pinsan ng nasawing si dating ASG Spokesman Aldam Tilao, alyas Abu Sabaya sa isinagawang operasyon sa Makati City.

Kinilala ni Defense Secretary at ATTF Spokesman Eduardo Ermita ang natimbog na suspect na nakilalang si Ibno Alih Ordoñez, alyas Ibno Abbas Abdil.

Si Ordoñez na may patong sa ulo na P1 milyon ay sangkot sa serye ng kidnapping at tatlong pagpatay sa lalawigan ng Basilan.

Kasabay nito, inihayag ni Ermita na isang sibilyang tipster ang muling magiging instant millionaire matapos nitong ituro ang pinagtataguan ni Ordoñez.

Natunton ang suspect sa bisinidad ng Bayani Road, Ft. Bonifacio, Makati City, kamakailan.

Dinakip ito sa bisa ng warrant of arrest na ipinalabas ng Basilan City Regional Trial Court kaugnay ng pagdukot sa mahigit sa 50 guro at estudyante sa Tumahubong at Sumisip, Basilan noong Marso 2000.

Napag-alaman na si Ordoñez ay dumating sa Metro Manila noong 2001 at dito nakapagnegosyo pa ito ng school bus service na nagseserbisyo sa isang eksklusibong eskuwelahan sa lungsod.(Ulat ni Joy Cantos)