Ex-police,4 pa timbog sa karnap

Bumagsak sa mga tauhan ng PNP-Traffic Management Group (TMG) ang limang pinaghihinalaang miyembro ng isang big-time carnapping syndicates kabilang ang isang retiradong pulis sa isinagawang operasyon kahapon ng madaling-araw sa lalawigan ng Bataan.

Nakilala ang mga nadakip na sina ret. SPO1 Ramson Cordero ng Bataan Provincial Police Office,residente ng bayan ng Samal at sangkot sa carnapping at chop-chop syndicate; Orlando Montemayor; Romeo Punzalan; Edward Pizaro at Elna Victoria.

Nabatid na nagsimula ang operasyon ng mga awtoridad dakong alas-8:40 kamakalawa ng gabi at tumagal ang kanilang follow-up operation hanggang kahapon ng madaling-araw sa munisipalidad ng Samal.

Nabatid na ang mga nadakip ay pawang kabilang sa kilabot na Cordero chop-chop/carnapping syndicate na siyang nagsu-supply ng mga chop-chop na piyesa at segunda-manong sasakyan sa Banawe, Quezon City at sa Bulacan.

Nabatid na isang buy-bust operation ang isinagawa ng mga awtoridad sa grupo na dito nahulog ang mga suspect at nadakip.

Nakatakdang sampahan ng kaukulang kaso ang mga suspect. (Ulat ni Joy Cantos)