Dance instructor pinatay sa sakal

Isa na namang bakla at dance instructor ang natagpuang patay sa loob ng kanyang kuwarto matapos na sakalin at daganan ng unan kahapon ng tanghali sa Quezon City.

Nakilala ang biktima na si Bienvenido Balmores, 36, ng Unit 32 Bldg. 5 Bliss, Brgy. Bagong Pag-asa ng nabanggit na lungsod.

Batay sa inisyal na imbestigasyon ng Central Police District-Criminal Investigation Unit (CPD-CIU), natagpuan ang biktima dakong alas-11:20 ng tanghali sa kanyang kuwarto ng kanyang room mate na si Darius Sagal.

Ayon kay Sagal, umalis siya bandang alas 9 ng umaga upang magsimba subalit ng siya ay bumalik nakita na lamang niyang patay na ang biktima at nakasuot lamang ng shorts.

Lumilitaw naman sa pagsisiyasat ng pulisya, ang biktima ay pinatay sa sakal at dinaganan ng unan sa mukha.

Nagsasagawa pa rin ng follow up ang pulisya.(Ulat ni Doris M. Franche)