Ito ang nabatid kahapon kay PDEA Executive Director General Anselmo Avenido Jr. kasunod ng pagkakatimbog sa dating teen idol na si William Martinez na lumabas na positibo sa paggamit ng shabu.
Ayon kay Avenido, sa kasalukuyan ay may 15,000 katao silang minamanmanan base sa mga natanggap na intelligence information at mga pangalang isinumbong mismo ng ilang lokal na opisyal mula sa barangay level pataas dahil sa pagkakasangkot at pagkagumon sa ilegal na droga.
Nabatid na bago pa masabat ang aktor sa PAL domestic terminal patungong Dipolog City ay may mga tinitiktikan na silang mga artista na kabilang sa kanilang watchlist.
Sinabi pa ni Avenido na hindi nila partikular na tinututukan ang mga artista dahil nadakip lamang si Martinez. Lahat umano ng kasama sa kanilang watchlist na kinabibilangan din ng ilang mga kilalang personalidad at maging mga kilalang negosyante basta kabilang sa kanilang watchlist ay kanilang tinutugaygayan.
Maging sa hanay ng mga pulitiko ay mayroon din silang minamanmanan.
Binigyang diin pa nito na walang sasantuhin ang anti-drug campaign ng pamahalaan at patuloy ang kanilang puspusang operasyon laban sa naglipanang ilegal na droga at maging sa mga personalidad na sangkot dito. (Ulat ni Joy Cantos)