Peace covenant sa mga kandidato isusulong ng NPDO

Isusulong ni Northern Police District Office (NPDO) director Chief Supt. Marcelino Franco ang paglagda sa isang ‘peace covenant’ ng mga kandidato sa CAMANAVA area upang matiyak ang isang malinis at mapayapang eleksiyon sa Mayo.

Ayon kay Franco, malaking tulong sa kanila kung pipirma sa isang covenant ang mga kandidato bago at hanggang sa matapos ang halalan.

Ipinaliwanag ni Franco na ang Caloocan City ay isa sa mga lungsod na idineklara ng Commission on Election na hotspot dahil na rin sa alitan ng mga kandidato tuwing panahon ng eleksiyon.

Ilan sa mga nagbigay ng suporta ay sina Congressman Enrico Echiverri at dating alkalde Macario Asistio na kapwa tumatakbo sa pagka-mayor ng nasabing lungsod.

Binalaan naman ni Franco ang kanyang mga pulis na makikitang nakikipag-ugnayan sa mga kandidato. Aniya, agad niyang irerekomenda ang suspensiyon ng mga ito sa serbisyo. (Ulat ni Rose Tamayo)