American national timbog sa droga

Isang American national ang dinakip ng mga tauhan ng Western Police District (WPD) matapos na mahulihan ng ilang gramo ng shabu sa isinagawang buy bust operation kamakalawa ng umaga sa lungsod ng Maynila.

Nakilala ang nadakip na si Charles Petrocelli, 35, ng 5-K Danovi St., Angeles City.

Sa ulat ng pulisya, nadakip ang suspect ng mga elemento ng WPD Station 5 dakong alas-10 kamakalawa ng umaga sa kahabaan ng M.H. del Pilar St. Ermita.

Isang asset ang nagpanggap na kukuha ng droga sa naturang kano sanhi upang madakip ito ng mga pulis na naghihintay sa bentahan ng droga.

Nakuha sa suspect ang anim na pakete na naglalaman ng shabu na ibinebenta nito sa mga kliyente.

Nakatakdang sampahan ng kaukulang kaso ang naturang Kano. (Ulat ni Danilo Garcia)