Samantala, isang binatang bystander ang nasugatan sa holdap makaraang paputukan ng mga suspect ang gulong ng sasakyan ng biktima.
Si Ong, negosyante at residente ng #8 Camia St., Happy Subdivision, Valenzuela City ay hindi naman nasugatan sa insidente. Gayunman, kinulimbat ng mga suspect ang kanyang cash, gold ring, ATM card at mahahalagang dokumento.
Nadamay sa naganap na holdap ang bystander na si Bernard Bracero sanhi ng tinamo nitong tama ng bala sa katawan.
Base sa ulat ng pulisya, naganap ang insidente dakong alas-6:30 ng gabi sa parking lot ng Petron gasoline station sa panulukan ng Harrison at Cuneta Avenue sa nabanggit na lungsod.
Napag-alaman na nakahinto dito ang sasakyan ni Ong na isang Mitsubishi L-300 na kulay puti nang lapitan ng mga suspect at agad na tinutukan ng baril.
Isa sa mga suspect ang sapilitang humablot sa bag ng biktima na nandoon ang mahahalagang gamit at alahas at pera ng biktima.
Bago magsitakas ay binaril pa ng mga suspect ang kanang gulong ng sasakyan ng biktima na tumalbog sa semento at tumama naman sa dumadaan na si Bracero.
Tuluyang tumakas ang mga suspect at sumakay sa isang nakahimpil na motorsiklo. (Ulat ni Lordeth Bonilla)