Pulis nabiktima ng karnap sa parking ng mall

Isang tauhan ng PNP na nakadestino sa National Capital Region Command ang nawalan ng kanyang sasakyan sa loob ng parking sa isang shopping mall sa Alabang, Muntinlupa.

Nakilala ang nabiktimang pulis na si PO2 Conrado Duran, 34, ng RMT Complex, Tunasan, Muntinlupa. Nawala ang kanyang semi-stainless jeep na may plakang VAW-157 dakong alas-3:30 ng hapon.

Ayon sa inisyal na imbestigasyon, ipinarada nito ang kanyang sasakyan sa first level ng parking lot ng Metropolis Shopping mall at ilang sandali lamang siyang umalis at sa pagbalik ay nadiskubre na wala na ang kanyang sasakyan.

Inireport ng biktima sa security officers ng mall ang insidente at doon niya nabatid na hindi lamang siya ang nawalan ng sasakyan kundi pang walo na siya sa nagiging biktima ng karnap. (Ulat ni Edu Punay)