Nakabitin pa sa kisame nang matagpuan si Russel Odeon, 31, binata, house painter at residente ng 12 Meriales St., Abalos, Valenzuela City.
Natagpuan ang bangkay nito dakong alas-7 ng gabi ng kanyang kaibigang si Edmund Tangzo sa abandonadong bahay na pag-aari ng tiyahin ng nasawi na si Erlinda Puno na matatagpuan sa 30 San Miguel Ridge, Marulas, Valenzuela.
Ayon kay Tangzo, madalas na nagtutungo ang biktima sa nasabing lugar sa tuwing magkakaroon ito ng problema kung saan nitong mga huling araw umano ay idinaing ng biktima sa kanya ang hirap na nararanasan nito sa buhay at ang responsibilidad niya sa pamilya na hindi nito magampanan ng lubusan.
Huli umanong nakitang buhay ang biktima sa kanilang tahanan kung saan malungkot ito at nag-aayos ng isang nylon cord. Nang tanungin ng mga kaanak nito kung para saan ang kanyang ginagawa ay umiling lamang ito.
Bago umano sumapit ang takip-silim ay umalis si Odeon sa kanilang bahay at nagtungo sa abandonadong bahay ng kanyang tiyahin. Ilang oras pa ang nakalipas ay natagpuan itong nakabitin at wala nang buhay. (Ulat ni Rose Tamayo)