Pisong taas pasahe,igigiit

Bagamat naibasura na kamakailan ng LTFRB ang pisong fare increase na ginigiit ng transport groups, muling umapela ang naturang grupo sa tanggapan na aksiyunan na ito dahil na rin sa panibagong pagtataas na presyo ng gasolina.

Sa isang panayam, sinabi ni LTFRB Chairman Dante Lantin na umapela sa kanyang tanggapan si Medardo Roda ng PISTON at Efren de Luna ng PCDO-ACTO para aksiyunan na ang kanilang hiling tungkol sa pisong pagtataas sa pasahe sa mga pampasaherong jeep.

"Dahil sa bagong development na tumaas ang presyo ng gasolina, umapela sila kaya’t muli naming ire-review ang bagay na ito," pahayag pa ni Lantin.

Sinabi pa ni Lantin na hiningan na nila ng reaksyon ang tanggapan ng Solicitor General hinggil sa naturang pagbabago sa halaga ng gasolina at sa hakbangin ng transport groups na maitaas ang pasahe. Inaasahang sasagutin ito ng SolGen sa darating na Lunes.

Ipinahiwatig ni Lantin na baka sa pagkakataong ito ay mapagbigyan ang kahilingan ng transport groups na maitaas na ang pasahe dahil sa naganap na namang oil increase noong nakaraang linggo. (Ulat ni Angie dela Cruz)