Nasorpresa kahapon si Supt. Angelito Sta. Mina, station commander ng Station 3 at C/Insp. Ferdinand Quirante ng Blumentritt PCP nang biglang dumating si Atienza kasama si WPD Director Chief Pedro Bulaong at nag-inspeksyon sa nasasakupan nitong lugar dakong alas-11 ng umaga.
Dito nadiskubre ng Alkalde na patuloy pa rin ang nagkalat na vendor sa harapan mismo ng Station 3 sa Blumentritt kaya’t kaagad nitong ipinasibak ang dalawa kay Bulaong na siya namang kaagad gumawa ng rekomendasyon na epektibo kaagad kahapon.
Ayon sa Alkalde, nagpagawa na umano sila ng New Antipolo market o Talipapa sa nasabing lugar upang dito na manatili ang mga vendors at hindi sa gitna ng kalsada na siyang nagdudulot ng masikip na daloy ng trapiko sa kahabaan ng Blumentritt.
Nabatid na nauna na ring winarningan ni Atienza si Sta. Mina at mga tauhan nito noong inauguration ng bagong talipapa na huwag nang pag-istambayin ang mga vendors sa harapan ng presinto dahil sa pangit itong tingnan at nakakasagabal na rin sa mga commuters. (Ulat ni Gemma Amargo)