Pulis, 4 pa arestado sa droga

Lima katao kabilang ang isang pulis probinsiya ang naaresto ng mga tauhan ng Drug Enforcement Unit ng CPD Batasan Station sa Quezon City.

Nakilala ang mga nadakip na sina PO1 Daniel Torres, 37, nakatalaga sa PNP Region 8; Robert Torres, 22; Emilyn Yago, 24; Jeannete Galang, 23 at Sisa dela Cruz, 24.

Ayon kay CPD director Chief Supt. Napolen Castro na isang impormante ang tumawag sa kanila at ipinagbigay-alam ang pagtutulak ng droga ng mga suspect sa nasabing lugar.

Dakong alas-11 ng gabi kamakalawa nang salakayin ng pulisya ang bakanteng bahay sa St. Vincent St. na siyang ginawang hideout ng mga suspect at doon nadakip ang mga ito.

Nakuha sa pulis ang isang baril gayundin sa kanyang mga kasamahan ang hindi pa mabatid na gramo ng shabu at drug paraphernalias. (Ulat ni Doris Franche)