Ama na pumatay sa anak kinasuhan ng parricide

Sinampahan ng kasong parricide sa Manila Prosecutor’s Office ang isang ama na gumilit at pumatay sa kanyang pitong buwang gulang na anak matapos na umano’y saniban ng demonyo ang katawan nito sa Maynila.

Buong pagsisisi naman ang nadarama ngayon sa loob ng WPD Integrated Jail ang suspect na si Isagani Intong, Jr. 21, ng Malonzo Compound, Pier 2 North Harbor, Tondo matapos na malamang napatay niya ang kanyang anak na si Jewelle Arce.

Ayon kay Intong, hindi niya alam ang kanyang ginawa dahil sa parang may sumapi sa kanyang demonyo nang gilitan niya ng leeg ang kanyang anak.

Nabatid na nawala ang bata noong Hulyo 11 subalit ipinagtapat naman ni Intong sa kanyang live-in partner na si Magnolia Arce na napatay niya ang kanilang anak at saka niya ibinalot sa sako.

Sinabi ng pulisya na nasa impluwensiya ng droga ang suspect nang isagawa nito ang karumal-dumal na krimen. (Ulat ni Danilo Garcia)