Mag-ama minasaker ng sikyu

Pinagbabaril hanggang sa mapatay ng isang security guard ang isang mag-ama makaraang maghiganti ang una sa matagal na nilang alitan ng huli, kamakalawa ng gabi sa Parañaque City.

Mabilis na tumakas ang suspect na nakilalang si Ricky Lozada matapos ang isinagawang krimen.

Samantala, kapwa hindi na umabot pang buhay nang isugod sa Parañaque Community Hospital ang mag-amang biktima na nakilalang sina Antonio, 51, at Ronnie Devecion, 24, ng Palasan St., Barangay San Dionisio, ng nabanggit na lungsod. Nagtamo ang mag-ama ng mga tama ng bala ng baril sa iba’t ibang bahagi ng katawan.

Ayon sa inisyal na imbestigasyon ni SPO3 Odeo Carino, naganap ang insidente dakong alas-7:50 ng gabi kamakalawa sa may Palasan St., Barangay San Dionisio.

Nabatid na magkasamang nakatayo ang mag-amang biktima nang biglang sugurin at pagbabarilin ng suspect na naging dahilan ng kanilang kamatayan.

Napag-alaman na may dati nang alitan ang suspect at ang matandang Devecion at posibleng paghihiganti ang motibo sa isinagawang krimen.

Patuloy pa ring sinisiyasat ang insidente.(Ulat ni Lordeth Bonilla)