6 na MMDA traffic enforcer timbog sa kotong

Inaresto ng mga tauhan ng NCRPO-Regional Intelligence Service and Operations Office (NCRPO-RISSO) ang anim na traffic enforcers ng MMDA habang nasa aktong kinikikilan ang kanilang nahuling driver sa Quezon City kamakailan.

Kinilala ni NCRPO chief Deputy Director General Reynaldo Velasco ang mga dinakip na sina Jose Angeles, Romy Solano, Richard Dismanay, Elpidio Palmones, Ismael Gaspar at Eliezer Bolanbao, pawang nakatalaga sa MMDA.

Nabatid na ang anim ay naaresto sa panulukan ng Road 1 at 13 Mindanao Ave., West Ave. habang kinokotongan ang mga nahuling drivers na may rutang Quiapo-Project 6.

Dahil dito, agad na hiniling ni Velasco kay MMDA chairman Bayani Fernando ang agarang pagsibak sa anim na traffic enforcer.

Aniya, posibleng marami pang driver ang mabiktima ng suspect kung hindi patatalsikin ni Fernando sa serbisyo. (Ulat ni Doris Franche)