Agad namang sumuko sa pulisya ang suspect na nakilalang si Joel Abellano, 26, ng Luzon St., Barangay Pitogo ng lungsod na ito.
Samantala, ang biktima na hindi na umabot pang buhay nang isugod sa Ospital ng Makati ay nakilalang si Rolando Unobia, 28, ng Valenzuela City sanhi ng tinamong mga saksak sa katawan.
Ayon sa ulat ng pulisya, naganap ang insidente dakong alas-2:30 kamakalawa ng madaling araw sa #125 Luzon St., Barangay Pitogo ng nabanggit na lungsod.
Nabatid na nadatnan ng suspect ang kanyang misis na si Rosabella, 26, na katabing natutulog sa sala ng kanilang bahay ang biktimang si Unobia.
Nagdilim umano ang paningin ng suspect at dala ng matinding galit at selos, kumuha ito ng patalim at agad na inundayan ng saksak ang biktima.
Nabatid pa na matagal na umanong nagdududa sa kanyang misis ang suspect na may kinalolokohan itong ibang lalaki subalit wala siyang matibay na ebidensiya hanggang sa mahuli niya na magkatabi itong natutulog. (Ulat ni Lordeth Bonilla)