Mag-utol kritikal sa kainuman

Nasa kritikal na kondisyon ngayon ang isang magkapatid matapos na pagsasaksakin ng kanilang kainuman na pumintas at nangantiyaw sa kanilang pinabiling pulutan kahapon ng madaling-araw sa Caloocan City.

Inoobserbahan ngayon sa Far Eastern University Hospital sa Quezon City ang mga biktima na nakilalang sina Isidro Jacobo, 46, construction worker at kapatid nitong si Dennis, 31, kapwa residente ng Sta. Cruz Compound, Bagumbong ng naturang lungsod.

Ang mga ito ay nagtamo ng malalalim na saksak sa iba’t ibang bahagi ng katawan.

Kasalukuyan namang pinaghahanap ng mga awtoridad ang suspect na si Ariel Azur, 23, security guard ng Sto. Niño, Brgy. 173, Congressional Village, Bagumbong na mabilis na tumakas matapos ang insidente.

Sa imbestigasyon ng pulisya, dakong ala-1:50 ng madaling-araw nang maganap ang insidente sa isang bakanteng lote kung saan nag-iinuman ang mga biktima at suspect.

Dahil sa wala nang pulutan, inutusan ng nakatatandang Jacobo ang kanyang kapatid at nakabili lamang ng dinuguan.

Agad na kinantiyawan ng suspect ang mga biktima na ikinagalit ng mga ito hanggang sa magkaroon ng mainitang pagtatalo.

Mabilis namang kumuha ng patalim ang suspect at agad na inundayan ng saksak ang magkapatid na biktima. (Ulat ni Rose Tamayo)