Trainor sinisi sa pagkawala ng elepante

Sinisisi ng Uniprom Inc. sa trainor ng elepanteng si "Jumbo" ang pagkawala nito noong Huwebes ng tanghali sa Quezon City.

Kasabay nito, nakatakdang magsampa ng kaso ang aktor na si Mark Gil laban sa may-ari ng elepante na umano’y nandura sa kanya kamakalawa habang kinukunan nito ng litrato si Jumbo.

Ayon kay Lucas Pasilao, Chief Operating Officer ng Uniprom Inc. at namamahala sa Elephant World, lumilitaw na naiwang bukas ni Lu Salangam ang gate na pasukan ng mga tao habang isinasagawa ang taping ng morning talkshow na Sis kaya doon lumabas ang higanteng elepante.

Aniya, sapat naman ang seguridad na ibinibigay ng Araneta Center para sa 10 elepante na kasama sa elephant show. (Ulat ni Doris Franche)