Lasing na pasahero binoga ng kapwa pasahero, patay

Isang lasing na pasahero ang binaril at napatay ng kapwa niya pasahero sa bus makaraang magalit ang huli nang paalisin siya ng una sa upuan, kamakalawa ng gabi sa Makati City.

Patay na nang idating sa Makati Medical Center ang biktima na nakilalang si Danilo Buena, 42, ng Barangay Bayanan, Muntinlupa City.

Mabilis namang tumakas ang hindi nakikilalang suspect matapos ang insidente.

Ayon sa ulat ng pulisya, naganap ang insidente dakong alas-11:30 kamakalawa ng gabi habang sakay sa isang bus ang biktima at suspect.

Nabatid na lasing umano ang biktima at pinaalis nito sa kinauupuan ang suspect. Hindi pa umano nakontento ang biktima at sinipa pa nito ang suspect.

Hindi na nakapagpigil pa ang suspect at hinila ang biktima at saka binaril. (Ulat ni Lordeth Bonilla)