Bagitong pulis timbog sa shabu

Isang bagitong "hoodlum in uniform" ang nadakip ng pinagsanib na puwersa ng Armed Forces of the Philippines (AFP) at Philippine Drug Enforcement Agency (PDEA) sa isang drug raid, kahapon ng umaga sa Quezon City.

Nakilala ang nadakip na suspect na si PO1 Angelito Panganiban, nakatalaga sa National Capital Region Police Office (NCRPO) sa Bicutan, Taguig.

Nakatakas naman ang kanyang mga kasabwat na mag-asawang sina Rogelio Besa at Melinda, kapwa residente ng #46 G. Magdim Compound, Quezon City.

Ayon sa ulat, ni-raid ng mga operatiba ng PDEA at Anti-Crime Task Force (ACTAF) ng AFP ang bahay ng mag-asawang Besa sa bisa ng search warrant na ipinalabas ng Quezon City Regional Trial Court.

Dito nasorpresa si Panganiban kung saan nakumpiska sa kanyang posesyon ang limang pakete ng shabu, habang agad na nakatunog ang mag-asawang Besa at nakatakas.

Sa paghahalughog ng mga awtoridad, nakumpiska ang tinatayang 142.1 gramo ng shabu sa loob ng naturang bahay.

Nakadetine ngayon ang suspect na si Panganiban at anak ng mga Besa na si Rogelio Jr. habang inihahanda ang pagsasampa ng kasong Comprehensive Drugs Act of 2002. (Ulat ni Danilo Garcia)