2 estudyante ginulpi, binaril ng pulis, 1 patay

Isang estudyante ang napatay habang isa naman ang nasa kritikal na kundisyon makaraang upakan at barilin ng pulis kasama ang tatlo pang suspek sa Caloocan City kahapon ng madaling araw.

Kinilala ang napatay na si Paul Julius Roque,16 ng 153 Stotsenberg St.,habang agaw buhay naman sa Jose Reyes Memorial Medical Center ang kasamahan nitong si Benidicto Janiola, 17 ng nasabi ring lugar.

Kasalukuyan namang nasa police custody ang mga suspek na sina P01 Edgardo Matabang, 26 binata at detailed sa Navotas PNP, Michael Chua, 18; Albert Fajardo,19 pawang mga residente ng Baltazar Bukid St., Caloocan City.

Kasalukuyan namang pinaghahanap ang ikaapat na suspek na nakilalang si Danilo Caliluno na siya umanong bumaril kay Roque.

Nabatid na dakong alas-2:45 ng madaling araw nang maganap ang insidente sa mismong kalyeng tinitirhan ng mga biktima.

Naargabyado ang biktimang si Roque nang makipagsuntukan ito kay Fajardo kaya nagtawag ito ng mga kasamahan.

Sa pagresbak ng mga biktima ay naabutan nila ang grupo ng mga suspek sa pangunguna ni Matabang na armado ng baril at higit na nakararami kung kaya’t sa halip na makaganti ay kinuyog pa sila ng mga ito at pinag-uupakan.

Hindi pa nakuntento ang isa sa mga suspek kaya ilang ulit na pinaputukan ang mga biktima kung saan agad na bumagsak ng walang buhay si Roque habang maswerteng nadala sa JRMMC si Janiola.(Ulat ni Rose Tamayo)