87-anyos na lola natusta sa sunog

Nalitson ng buhay ang isang 87-anyos na matandang babae makaraang makulong ng apoy ang silid nito matapos masunog ang kanilang tahanan sa Pasig City kahapon ng madaling araw.

Mistulang uling nang marekober ng mga bumbero ang bangkay ng biktimang si Amelia Gotinga, mula sa nasunog nilang tahanan na matatagpuan sa #40 San Antonio St., Brgy. Kapitolyo ng nasabing lungsod.

May teorya ang mga imbestigador na posible umanong nakatulugan ng biktima ang sinindihan nitong kandila na siyang pinagmulan ng sunog.

Ayon sa salaysay ng anak ng biktima na nakilalang si Godofredo, naalimpungatan umano siya at nakita na nilalamon ng apoy ang kanilang tahanan dakong alas-12:45.

Dali-dali umano siyang nagtatakbo sa basement na kinaroroonan ng silid ng ina na humihingi ng saklolo subalit wala siyang magawa dahil sa makapal na ang usok at nagbabagang apoy na bumabalumbon sa silid nito. (Ulat ni Joy Cantos)