4 na dayuhang aktor at aktres lumutang sa BI

Apat na dayuhang mga aktor at aktres ang pinagmulta ng Bureau of Immigration ng tig-P100,000 makaraang mapatunayang nagtatrabaho sa bansa ng walang kaukulang working permit.

Nagreport kay Immigration Commissioner Andrea Domingo kahapon sa tanggapan ng BI sina Nadine Schmidt, isang German; Anne Curtis, isang Australian; Jeffrey Rodriguez, New Zealand at Greg Martin, isang American.

Inamin ng mga nabanggit na dayuhan na nagtatrabaho sila sa bansa ng walang kaukulang working visas at pawang mga holder ng tourist visa.

Dahil dito, agarang inatasan ni Domingo ang mga nabanggit na magsumite ng kanilang aplikasyon para sa special work permit sa bureau bago maipagpatuloy ng mga ito ang kanilang mga trabaho.

Binigyan din ni Domingo ang mga nasabing aktor at aktres ng tig-isang buwang palugit upang magsumite ng kanilang petisyon para sa ‘recognition’ bilang mga Filipino citizens o mga permanent resident visas. Sa kabilang banda, sinabi naman ni Atty. Roy Almoro, executive director ng BI na tanging si Curtis lamang ang nagmanipesto ng kanyang intensyon para makilalang Filipino. (Ulat ni Jhay Quejada)