Estudyante kritikal sa 2 karnaper

Kritikal sa pagamutan ang isang 20-anyos na estudyante nang barilin ito ng isa sa dalawang di-nakikilalang lalaking karnaper matapos na harangin at tangayin ang sasakyan ng una, kamakalawa ng gabi sa Valenzuela City.

Inoobserbahan sa Fatima Medical Center sanhi ng isang tama ng bala ng 9mm baril sa likod ang biktimang si Wilfredo Rosales ng 169 7th St., Fortune Village, Brgy. Parada ng nasabing lungsod.

Sa ulat ng pulisya, dakong alas-8 ng gabi nang maganap ang insidente sa kahabaan ng Parada Road, Brgy. Parada, ng nasabing lungsod.

Nabatid na binabagtas ng biktima ang nasabing lugar sakay ng kanyang Starex van (WHZ-110) nang biglang sumulpot ang dalawang suspect sakay ng isang hopper.

Agad na iniharang ng dalawang suspect ang dalang hopper sa kalsada dahilan upang huminto ang biktima.

Isa sa mga suspect ang mabilis na lumapit sa nasabing van at walang sabi-sabing pinaputukan ang biktima habang agad na nakapasok ang isa pa at itinulak papalabas ng sasakyan ang biktima.

Nang humarurot papalayo ang mga suspect ay dala na ang sasakyan ng biktima. (Ulat ni Rose Tamayo)