Nilalapatan ng lunas sa Alabang Medical Center ang biktima na nakilalang si Arthur Ramis na nagtamo ng tama ng bala sa likod.
Sa ulat ng pulisya, dakong alas-3 ng madaling araw ay nakasakay sa isang pampasaherong bus ang biktima at ang asawa nitong si Jane na nakahimpil sa harap ng Metropolis Shopping Mall sa Alabang.
Nagulat si Jane nang hablutin ng hindi pa nakikilalang suspek ang suot niyang gintong kuwintas.
Nagsisigaw ito kaya’t hinabol naman ng biktima ang suspek hanggang sa ito ay masukol.
Hindi alam ng biktima na armado ng baril ang snatcher na agad bumunot ng baril.
Nang ito ay makita ng biktima, siya naman ang tumakbo subalit binaril ito ng suspek sa likod. (Ulat ni Lordeth Bonilla)