Tulak timbog sa 1-½ kilo ng marijuana

Ipinahamak ng kanyang malilikot na mata at kakaibang kilos ang isang lalaki dahilan upang siya ay sitahin ng mga pulis kaya nabuko itong may dalang isa at kalahating kilo ng pinatuyong dahon ng marijuana, kamakalawa ng hapon sa Malabon City.

Kasalukuyang nakakulong at nahaharap sa kasong paglabag sa RA 9165 ang nadakip na suspect na si Edwin Tacadina, 30, ng Banana Road, Potrero, Malabon.

Base sa ulat ng pulisya, dakong alas-4:30 ng hapon nang maaresto ang suspect sa naturang lugar habang dala nito ang isang travelling bag.

Naging matalim ang tingin nito sa mga naka-posteng pulis doon kaya siya nasita.

Nang tingnan ng mga awtoridad ang laman ng dala nitong bag ay natuklasan ang bitbit nitong pinatuyong dahon ng marijuana kung kaya agad itong inaresto. (Ulat ni Rose Tamayo)