Lalaki gumawa ng eksena sa mall dinakip

Isang lalaki ang dinakip ng pulisya makaraang gumawa ng eksena sa pamamagitan ng pag-inom ng muriatic acid sa isang mall, kamakalawa ng gabi sa Quezon City.

Kasalukuyang ginagamot sa Quezon City General Hospital ang naglason na si Ricky Cahili, 38, ng Doña Faustina Village, Tandang Sora, Q.C. makaraang arestuhin ng Baler Police bunga na rin ng kanilang natanggap na impormasyon na gumagawa ng tensyon ang una.

Sa report ni PO2 Nick Contado ng Baler Police Station, dakong alas-7 ng gabi nang makatanggap sila ng tawag mula sa pamunuan ng SM City North EDSA hinggil sa pagwawala ng isang lalaki na may hawak ng grass scissor at muriatic acid na kinuha nito mula sa SM Workshop.

Bago ang insidente, nabatid na tulirong pumasok sa mall si Cahili dala ang muriatic acid at grass scissor hanggang sa bigla na lamang itong magwala kayat nagkaroon ng tensyon sa loob nito.

Itinutok ni Cahili sa kanyang dibdib ang gunting at tinakot ang ilang security guard na sasabuyan niya ng asido ang mga ito kung magtatangkang lumapit.

Dahil dito, sinabi ng mga pulis na agad nilang kinordon ang lugar upang maiwasan na makapang-hostage mula sa mga shoppers.

Subalit makaraan ang isang oras, nagpasya na ang mga awtoridad na dambahin ang suspect at tuluyang maagaw ang gunting at asido.

Gayunman, nagawa pa ring makainom ng suspect ng asido at ito ay dinala sa nabanggit na ospital. (Ulat ni Doris M. Franche)