Saksi sa holdapan, binoga sa mata

Isang messenger ang binaril sa mata na naging dahilan ng kanyang kamatayan makaraang masaksihan nito ang isang insidente ng robbery holdup sa isang pampasaherong jeep, kamakalawa ng gabi sa Parañaque City.

Namatay noon din ang biktima na nakilalang si Flobert Mercadal, 26, ng Block 26, Lot 2, Francis St., Maricaban, Pasay City sanhi ng tama ng bala sa kaliwang mata buhat sa hindi pa batid na kalibre ng baril.

Mabilis namang nagsitakas ang mga suspect na holdaper matapos ang insidente.

Base sa inisyal na imbestigasyon naganap ang insidente dakong alas-6:45 kamakalawa ng gabi sa kahabaan ng West Service Road, Kilometer 13, Barangay Merville, Parañaque City.

Binabagtas umano ng biktima ang naturang lugar lulan ng kanyang motorsiklo hanggang sa mapahinto ito dahil sa matinding trapik.

Dito niya nasaksihan ang nagaganap na holdapan sa isang pampasaherong jeep sa kanyang harapan.

Hindi na nakakibo pa ang biktima hanggang sa bigla siyang puntiryahin barilin ng isa sa mga suspect sa mata na naging dahilan ng agaran nitong kamatayan.

Pinaghahanap ng pulisya ang mga suspect. (Ulat ni Lordeth Bonilla)