Nakilala ang nasawing dayuhan na si Jang Sung Lee, 39, negosyante at pansamantalang nanunuluyan sa Pan Pacific Hotel sa panulukan ng Malvar at Adriatico St., ng nabanggit na lungsod.
Ayon sa ulat, naganap ang insidente dakong alas-10:40 ng gabi nang paulanan ng bala ng baril ang biktima ng dalawang hindi nakikilalang lalaking lulan sa isang motorsiklo ang biktima habang kasama ang kanyang asawa’t anak patungo sa Diamond Tea House and Restaurant sa may Dr. Quintos St.
Binanggit pa na dumating sa bansa ang biktima buhat sa bansang Japan na doon ito ay may inayos na negosyo.
Walong tama ng bala ng baril sa iba’t ibang bahagi ng katawan ang tinamo ng biktima at hindi na umabot pang buhay nang isugod sa Manila Doctors Hospital.
Hindi pa matiyak ng pulisya ang motibo sa isinagawang pagpaslang, subalit tinitingnan nila ang anggulong may kinalaman sa insurance. (Ulat ni Ellen Fernando)