Trike driber sumingil ng labis, tinarakan

Isang tricycle driver ang iniulat na sinaksak at napatay ng isa niyang pasahero makaraang singilin niya ito ng mataas na pasahe, kahapon ng madaling araw sa Valenzuela City.

Hindi na umabot nang buhay ng isugod sa Valenzuela District Hospital ang biktimang nakilalang si Alfredo dela Cruz, 34.

Mabilis namang tumakas ang hindi pa kilalang suspect matapos ang isinagawang krimen.

Ayon sa ulat ng pulisya, dakong ala-1 ng madaling araw nang maganap ang krimen sa kahabaan ng St. Jude Subdivision ng naturang lugar kung saan inihatid ng biktima ang suspect.

Narinig ng mga testigo na sinisingil umano ng nasawi ang suspect ng halagang P50 na siyang pinagsimulan nang pagtatalo ng mga ito hanggang sa naglabas ng patalim ang suspect at inunday ng sunud-sunod sa biktima. (Ulat ni Rose Tamayo)