Frat war sa Paco; 1 patay

Isang 17 anyos na lalaki ang napatay matapos na mabaril sa isang rambol ng fraternity kahapon ng madaling araw sa Paco, Maynila.

Kinilala ng pulisya ang nasawing si Kermit Navarro, residente ng Mataas na Lupa ng nasabing lugar matapos magtamo ng isang tama ng bala sa katawan.

Pinaghahanap ng mga operatiba ng WPD ang isang grupo ng kabataan na responsable sa pagkamatay ng biktima.

Lumabas sa imbestigasyon, na ang rambol ay naganap dakong alas-3:15 ng madaling araw sa kahabaan ng South Super Highway, malapit sa San Andres st., Paco.

Ayon sa mga nakasaksi, nakita nila ang biktima na kausap ang mga kaibigan sa nasabing lugar nang dumating ang kaaway na grupo ng kabataan at walang sabi-sabing pinaputukan ng baril ang grupo ng biktima.

Minalas na tinamaan ang biktima at pagkatapos ay mabilis na nagsitakas ang mga ito. (Ulat ni Cecille Suerte Felipe)