Ang suspek na tadtad ng mga saksak at tama ng bala ng baril sa katawan ay nakilalang si Michael Dalimpapas ng Dumpsite Catmon ng nasabing lungsod.
Malubha namang nasugatan at ginagamot sa Tondo Medical Center si Vincent Angcon,18 na nagtamo ng isang tama ng bala sa dibdib.
Sa ulat ng pulisya,dakong alas-9 ng gabi sa may dumpsite ay bigla na lamang umanong hinablot ni Dalimpapas at i-hostage ang isang Joy Bartolada, grade 1 pupil at residente ng Dulong Hernandez st.
Bago naganap ang pag-hostage ng suspek ito umano ay hinahabol ng tatlong armadong kalalakihan at nang masukol ay hinablot nito ang bata at tinutukan ng baril.
Habang nakatutok ang baril ay lumapit para saklolohan ni Angcon ang bata subalit binaril siya ng suspek.
Nakakuha naman ng pagkakataon ang bata na makatakas nang kagatin nito ang kamay ng suspek.
Nang makatakas ang bata,dito na lumapit ang tatlong humahabol sa suspek at dito na ito pinagbabaril at pinagsasaksak bago tuluyang nagsitakas.
Nagtataka naman ang mga nagrespondeng awtoridad kung bakit shotgun ang kanilang narekober sa halip na kalibre .38 sa suspek.
Patuloy na nagsasagawa ng masusing imbestigasyon ang mga awtoridad upang matukoy ang tatlong armadong kalalakihan. (Ulat ni Gemma Amargo)