Business partner ni Golez, arestado sa baril

Inaresto ng mga tauhan ng Western Police District (WPD) ang isang lalaki na nagpakilalang kasosyo umano ni National Security Adviser Roilo Golez matapos na mahulihan ng matataas na kalibre ng baril nang sitahin ito dahil lamang sa simpleng paglabag sa batas trapiko, sa Nagtahan, Sta. Mesa Maynila, kahapon.

Kinilala ang mga naaresto na sina Benjamin Kintanar Jr., ng Parañaque City at ang driver nitong si Rolando Buenaflor.

Habang sinusulat ang balitang ito ay hindi pa nakukumpirma ng pulisya kung lisensyado ang dala nilang HKMP5 at dalawang kalibre .45 pistol.

Base sa ulat ng pulisya, nakasakay sa isang Lincoln Navigator na walang plaka ang mga ito ng habulin sila ng mobile car dahil sa paglabag sa trapiko.

Ayon pa sa pulisya, nagsisigaw umano si Kintanar na business associate ni Golez ng tumigil sila matapos silang masukol ng mobile patrol car.

Matapos silang sitahin at rekisahin ang nasabing sasakyan nakita ng mga pulis ang mga baril kaya inimbita ang dalawa sa presinto. (Ulat ni Ellen Fernando)